對於被譏為樂壇小強，網友鬧他笨X，Tommy不屑說：「啲人問我點解唔轉行，其實我呢類型artists好多，我都想做陳奕迅，我都想做劉德華，我未係吖嘛，大家將打不死精神、小強放喺我身上，既然改變唔到大家諗法，樂觀睇你哋真係欣賞我堅持，唔係點啫，我18歲入咗行，Tommy行街唔係冇人識，冇人識就唔會有人討論，梗係好多高低起跌，唔係老土話一日喺圈唔死一日有機會，我只係想繼續玩。」
嘆恩師放棄
至於恩師阿叻狠批他品格有問題，對他一早放棄，Tommy嘆謂：「我明，如果我係叻哥，我都會失望，一次又一次負面新聞，自己完全面對，要成功必須面對過去嘅錯，先可以重新企番出嚟，我應承會改，前輩罵我完全接受，惟有做畀佢哋睇，盡我最後一滴血都去做。」