爛賭、欠租、走數，前組合E-Kids成員阮民安（Tommy）出道13年，負面新聞鑊鑊新鮮鑊鑊金，網友譏他為樂壇小強，不留情面恥笑他笨X，跌落谷底的Tommy冇碟出冇戲拍，近日卻因自拍山寨MV令人氣反彈，他坦言現在餓唔親食唔飽，自嘲說：「我都想做陳奕迅、劉德華！」
撰文：余燕儀
現年32歲的Tommy出道時因E-kids受歡迎，以為自己紅了就囂，之後傳出06年在澳門賭錢借大耳窿被追債24萬、至最近欠房租、BIGBANG演唱會飛走數等連串負面新聞，形象跌落谷底的他，近日因自拍《踩唔死我》MV倒模照抄韓國人氣歌手G-Dragon的單飛歌《CRAYON》，引爆網民熱烈地彈熱烈地踩，譏笑他為樂壇小強，反而令Tommy人氣反彈。
自己插自己
對自己有彈冇讚的網友，Tommy笑笑口說：「其實我係玩緊自己，關你哋乜事，由頭到尾呢隻歌唔係攞嚟賺錢，只係攞嚟玩，可能有人覺得我重拍MV係冇橋，但大家要明白，重拍都唔容易，歌名叫《踩唔死我》，都預咗有呢個反應，咁多年喺我身上好多奇怪新聞，都插我唔死，不如自己插自己。」
06年在澳門賭錢欠債的新聞，Tommy一直耿耿於懷，事隔7年，他爆出另一版本真相：「我冇借過人一蚊，冇畀人挾返香港，嗰次係第一次入賭場，我都預你唔信，純粹講出嚟，我換咗二千蚊籌碼，有人叫我入會申請VIP，食飯搭船唔使錢，我申請咗張卡，話有十萬蚊額，賭場hold起三成，叫我玩幾鋪百家樂，我話唔識，佢話唔緊要幫我玩。」
Tommy大呻賭場的騙徒手法層出不窮：「佢幫我玩三鋪輸咗二萬一千，我話走，嗰刻已知騙局，之後賭場啲人同我搭船返港，話仲有VIP嘅form要填，落船有兩個古惑仔喺𨋢口等，話我喺澳門賭錢，借咗大佬十萬蚊。」Tommy慨嘆自己太蠢：「因為第二日要去電台做直播，啲人一直跟住我，話我要畀24萬，叫我簽欠單，否則跟埋我落電台，我打畀老闆同屋企人，最後簽咗。」問點解肯簽？他說：「諗住之後拆掂，唔通畀佢跟我去電台咩，嗰刻冇得揀，最後還咗12萬。」
個天想罰我
Tommy形容當時完全崩潰，甚至想尋死，他說：「呢件事將我所有經營嘅嘢一秒冇晒，好恐怖，嗰刻真係諗過結束生命，好在家人支持，我個人好硬頸，諗點救番自己。」為甚麼當年不公開真相？他自嘲說：「講都冇人信，我有時諗番，可能個天想罰我，因為當時E-kids好受歡迎，以為自己紅咗好掂，得罪好多人，覺得係個天要我跌，一跌就咁多年，好難再行番上去。」
至於最近發生的欠租和BIGBANG飛事件，Tommy亦全部否認，他說：「話我欠租畀人趕走，真係嬲，因為完全唔係事實，物業公司畀道歉聲明我，佢哋有同事喺討論區亂噏；啲飛我純粹做中間人，冇畀警察拉。」至於他的經濟情況，Tommy說：「一直都係咁，餓唔親食唔飽，我有匿埋登台你哋唔知之嘛。」
化妝：Qunnie Yiu
髮型：Eton@Double H Salon
場地提供：Hei Hei design@E-Max MaxHome