永恒策略（764）揸住嘅中國星（326）起勢升，永恒超級肥仔水。永恒公佈冇耐，話計劃行使中國星CB換股，及沽出換股後中國星38.3億股，每股成本價0.14元。中國星股價呢期發力，現價（0.241元）比永恒每股成本價，高出近0.10元。單係呢壇製作，永恒嘅潛在變現，高達9.2億銀，賬面增值/獲利，亦高達3.8億元，永恒市值幾多？3億銀咁大把！又永恒本身亦已經揸住淨現金9億銀，連埋潛在變現，永恒淨現金將高達18億銀，相當於每股6蚊，永恒家陣幾銀？講緊得0.96元。係咁意計數，永恒翻一番到1.90元，未有耐上到本身每股淨現金值3蚊，翻兩番到3.80元，亦係未有耐上到連埋潛在出售中國星權益反映嘅每股淨現金6蚊。吸引冇？
航天萬源大落後
中國航天萬源（1185）最新PB 0.88倍，係呢期市場再勁炒嘅環保股中，仲有折讓嘅少數股份。又同樣係航天系統嘅亞太衛星（1045），炒盈喜，股價一個月翻咗一番，航天萬源呢個月27日公佈業績，未郁過。話炒同系統好，炒焦點板塊好，航天萬源都好有point。短打博該股升20%到0.47元，PB 1倍多少少，仲係大落後。
錢雋