【困難重重】
常言道「創業難，守業更難」，在父親何厚炤撒手塵寰後，當年才剛踏入「三十而立」階段的何敬豐，便要負責扛起家族的兌換生意，延續並守護父親辛苦打拼而來的成果。
經歷過創業與守業兩關的何敬豐，深深體會到守業確實比創業難上成千萬倍。對他來說，要接手父親留下來的百匯兌換，不單僅僅是一盤生意，更附帶多一份無形壓力，「你創業就係自己對自己responsible，但係守業做得好係唔會有人俾credit你，相反你做得唔好就會變咗敗家，真係好難！」
不想被標上「敗家兒」的污名，就只有較前人做得更加出色，但要青出於藍卻非易事，全因守業要面臨更多挑戰。何敬豐認為守業要守得好，首先要攻破兩大難關，「點樣將以前嘅生意喺可以嘅範圍下改造，變成有更多盈利已經係一個challenge。另外，其實好多生意上嘅嘢已經係前輩留畀你，你接手單生意時一定有老臣子，你點樣以一個新人身份入去，用一個新思維同老嗰班人磨合又係另一個challenge。」
守住百匯兌換龍頭地位
六年光景茬苒，百匯兌換的「金漆招牌」並沒有毀在何敬豐手裏，帶領百匯穩坐澳門兌換業龍頭位置，「我老竇做嗰陣有6間，𠵱家店嘅數目翻咗一倍有13間。」雖然他成功「守業」，但他卻並不盲目留戀家傳祖業，更認為應該善價而沽，「我從來唔覺得因為家族生意所以唔賣得，無錯家族生意係要發揚光大，但去到一個stage你知道可能會被淘汰，如果到時你唔賣，就冇得做啦！」