簡文樂私人開設「皇家博物館」，展出私人珍藏，財政負擔甚重，二月二十二日下午開幕之時，有人問佢是否將博物館向外開放，收番若干入場費，彌補一下日常費用，簡文樂話最初本想如此，點知查完手續之後，發覺公共展覽館要向多個部門申請牌照，淨係消防批准文件，已需要大量裝修及建築改動，但商業大廈業主又唔肯喎，為你一個租客而搞咁多大動作，業主點計數呀。計來計去，簡文樂覺得最好不對公眾開放，任何人想參觀，必須事先申請成為Friends of the Museum（博物館之友），至於如何成為「朋友」，左丁山聽唔到，大家上網查一查好了。
匆匆參觀完畢，趕落樓下搵的士去銅鑼灣中央圖書館出席林悅恆書法展開幕禮，點知一來冇的士，二來搵到一架的士，司機立即拒載，唔肯去銅鑼灣，星期五下午五點幾，去銅鑼灣係塞車啲嘅。正在冇符之至，突然有七人車駛經面前，有人喝一聲：「去邊呀？」哦，馬主C、馬主T等人在車上，係參觀完博物館，由司機載返公司嘅，馬主C等係著名好人，叫咗左丁山上車，直奔太古三期，佢地落車之後，吩咐司機駛去中央圖書館，呢次真係出門遇貴人，安樂晒。
以為去唔切，誰知竟可準時到達，行入圖書館展覽館，不過未有開幕儀式，於是走咗一轉欣賞展品。林悅恆書法，左丁山冇資格評論，啲「綠葉好友」展覽，饒有趣味，譬如小思嘅中學一年班作文，竟然有參展，於是捉住小思一問：「乜咁耐嘅作品都完整無缺嘅？」小思話：「我屋企仲有小學時期嘅功課、作文㖭。」俾佢嚇親，唔怪得佢對香港文學史、文物研究得咁深入，首先由自己做起吖嘛。另外汪海珊（羅卡太太）展出中學時代（聖保羅男女）之貼堂作文，係「英五甲」學生身份，文章寫得固然好，但老師紅朱砂批示更加驚人，每隻字都見到功力深厚，顯然並非普通中文教師所寫得出嘅，問汪海珊：「老師是何人？」汪海珊話：「大書法家黃維琩老師」，想不到60年代之中文老師竟是超級高手，求諸今日，如沙中尋金，汪海珊與同學得遇此名師，可謂夠運。