年薪超過400萬元的曾俊華，一句「我都係中產」令全城譁然，姑勿論是財爺妄自菲薄，抑或是其辯駁的lifestyle，中產「下流化」除適用於曾司長外，套用在股市亦相當見效，就由大家生活經常接觸的衣、食講起。
股榮統計過去一年，環球及本地主要服裝股股價表現，結論是越中產、價錢越「下流」、股價就越有睇頭。
思捷衰「唔夠下流」
去年幫襯最多的是Uniqlo，女性朋友則鍾情Zara，這兩間主打中產、但價錢平民化的連鎖店，母公司股價同樣於一年間爆升五成。
反觀，同樣瞄準中產市場的思捷（330），股價一年間暴瀉44%，包浩斯（483）及I.T（999）則跌逾四成及三成。撇除款式及設計，三者都衰係「唔夠下流」，當Zara及H&M一件衫賣百餘元，思捷等同一style的產品，憑甚麼賣貴數倍？本地薑表現最好是佐丹奴（709），中產形象配合「下流化」價格，算是在外國品牌夾擊下保住市佔率。
至於走平民路線的堡獅龍（592），一年股價跌42%，點解cheap（股價）唔起？原因很簡單，中產「下流化」，永遠吃香過「下流」中產化，事關這個世界有上流社會下等人，但不會有「下流」社會上等人。形象早已被深深植入，難以逆轉突圍。
飲食股方面，賣咖啡聞名的連鎖店星巴克，股價一年彈14%，平穩未算標青。主攻平民的麥當勞，年內密密加價，股價卻跑輸大市，一年間原地踏步。相反本地快餐股竟成為逆市奇葩，股價相當靚仔。
翠華最懂得包裝
三間本地快餐股本質沒有改變，改變的只是一間接一間的老牌食肆捱不住貴租結業，結果集團式快餐店成為打工仔以至中產，無可奈何的選擇，仍然屹立不倒的食肆，餐牌無可避免要狂加，中環午飯一頓叉油雞飯，盛惠一百蚊，對比快餐連鎖店六、七十蚊有找，快餐股自動「升呢」為中產「下流」股。最懂得包裝的翠華（1314），菜式飲品又玩冰鎮、又玩農家，就是睇穿中產那份自我感覺良好。
揀好股，毋須費神。正如肥佬黎話齋，「不扮高深，只求傳真」，只要肯注意身邊的事物，留意日常生活的點滴，大家總會有好嘢發現。就如三星贏蘋果，香港電訊（6823）贏數碼通（315），信人點解唔信自己呢！
股榮