若果有國內遊客上周才第一次蒞臨香江，定會驚嘆此地的運動氣息，然後回鄉時向鄉里大發議論，「香港人呢，俾政治壓得唞唔到氣啦，所以就化怨憤為力量，明明放假星期日都晨咁早起身走去跑馬拉松；唔夠年紀嘅學生哥呢，又好鍾意去田徑場狂奔喎，唔跑嘅都嗌埋一份，觀眾席真係插針都唔入呀，下次我哋去香港玩呢，真係唔好去運動場呀，去主題公園吖，遲啲仲有水上樂園㖭。」
當前排人人掛住撲曼聯波飛，遲啲又要鬥搶英超四角賽門票時，渣馬都算為香港運動員攞番啲面子，難得一項盛事傳媒焦點響晒港產運動員身上，所有外國選手就算係攞冠軍都無人理，唯一例外係101歲嘅印度人瑞跑手，之但係唔係好明點解佢要掛靴唔跑，佢嘅講法係畀啲機會年輕人，我哋嘅睇法係有佢參與先鼓勵到多啲年輕人，正如傑斯都未話攰，朗尼點好意思唔跑多兩步呢。
香港地每日新聞太多，激勵的都太少，所以難得有些少正能量嘅，真係唔好放過。學界田徑賽今年有電視直播，讓我哋可以重溫吓那些年的熱血沸騰；有過來人就慨歎點解今屆先有直播，佢當年威威時又冇人播，或者建議佢繼續努力，有日變做人瑞時跑馬拉松，肯定好多人報道。睇直播，見到好多同學仔都唔怕鏡頭，臨起跑仲有心情向鏡頭chok樣，可能係今時今日隨時自拍訓練有素，亦要多得劉翔前幾年響鏡頭前親身示範，做旺咗個場。
電視直播嘅受益人除咗觀眾之外，亦包括入唔到場嘅家長及同學仔，以及一眾嘅跑手同教練，皆因細心欣賞之後，發現唔少跑手造型一流，但跑姿卻大有問題，一味向前望有幾可抽身睇吓自己嘅姿態呢，做壞姿勢的話，輕則跑得慢，重則跑壞腳，教練們睇嚟要加多一堂睇video嘞。
成大事由小事做起，大人物是否受人尊重亦要睇佢點對待小事情，冠軍選手得獎感言會多謝啦啦隊及教練老師，正如李安導演在奧斯卡裏感謝台灣，感謝太太。話時話，畢業生會掛住母校，咁我哋香港人又點解好似越來越少讚頌香港呢？
keyman
now TV主持
mailto:[email protected]