【隔牆對論】
年年退稅、免差餉、電費補貼、綜援出雙糧……派過了糖，竟沒一點掌聲，香港人要求是否太高？談預算案，超越了中產的中原集團創辦人施永青、代表基層的社區組織協會主任何喜華，一個預測樓市本月轉勢，一個狂呻草根如何連租樓都有困難，立足點南轅北轍，但一致要求政府不要再如此派糖。
記者：姚國雄 王家文
記：《蘋果》記者
施：施永青
預算案公佈前夕，區區樓價爭相破頂，2013年一萬元一呎，已屬正常。政府以額外印花稅、買家印花稅、雙倍印花稅壓抑需求，但樓價一直飆升，政府出招被轟「冇料到」。
記：政府上周五（2月22日）公佈「雙辣招」雙倍印花稅，是否都不能平抑樓市？
施：曾蔭權嘅額外印花稅、之後嘅買家印花稅，𠵱家嘅雙倍印花稅，係相當有效調校房地產措施。之前冇效，因為房地產價格上升，唔係純粹係房地產問題，係世界大部份政府行緊量化寬鬆，唔係只調校房地產可以解決。
正如你腎衰竭，你醫個腎，點知原來腎衰竭係因為心肺功能出咗問題，你應該醫個心，𠵱家藥就落咗個腎度，遲早個腎俾你醫死！
額外印花稅差唔多將全部炒家排除，𠵱家連本地人買第二間樓都受壓抑。一個市場，大部份人都受到阻壓、唔入得市，你話對個市場有冇影響？呢三招出咗之後，我哋（中原）嘅生意少咗差唔多七成。𠵱家就係駱駝背上最後一根稻草。香港（房屋）大部份都係投資需求，香港嘅樓宇總存量多過家庭總數字，唔係供不應求。
記：真正買家應唔應該買樓？
施：我去年第二、三季開始已叫人審慎，我本嚟預計第四季調整咗，但最後調咗少少冇調到。我認為個調整係會嚟到。（要等多幾耐？）快㗎喇，𠵱家出埋呢幾招，3月份就見功，我認為3月個市場感覺會全面改變。我都唔係成日講啲咁激嘅說話，總之3月情緒會有變。
中產在預算案中受惠退稅免差餉，子女免稅額獲提高令中產多慳「幾百蚊」，被指是小恩小惠。月入逾37萬元的曾俊華自稱了解中產，更稱自己「飲咖啡、看法國電影」是中產。
記：你是否中產？你覺得預算案能否幫到中產？
施：我唔係中產，我比中產嘅環境好好多，但係我做過無產、做過中產，𠵱家我屬於資產較多嘅人，我大部份資產都係放咗喺慈善基金上面。
預算案一向都唔係為中產或基層而設，係為成個香港而設。我唔認同預算案對中產照顧不足，對於中產，政府應締造環境等佢哋發展，做好教育畀佢哋子女。中產希望政府派呢樣、派嗰樣，咁樣係引導中產向下流。一個好嘅社會，倚賴政府嘅人應該越來越少。我覺得成個社會情緒都係引導中產期望政府照顧，呢個唔係好出路。
估錯數已成曾俊華的指定動作。每年預算案也只見退稅、免差餉、電費補貼、綜援、生果金、傷殘津貼出雙糧等一次過派糖措施，未見長遠政策改善社會結構性問題。
記：如何評價曾俊華的理財哲學？
施：審慎理財係啱，但𠵱家係審慎過份，曾俊華對政府收入嘅界定方式出錯，例如房地產嘅賣地收入同印花稅收入，列作非經常性收入，因為收入時多時少，政府唔夠膽將呢啲收入用喺經常性支出上面。
但香港房地產嘅收入，係相當經常性，每年都有人需要換樓、有新生家庭，房地產收入應該用作經常性開支，改善社會服務。但政府唔肯，變咗社會服務受局限，幾屆政府都唔敢面對呢個問題。
記：但預算案派糖，總算對基層、中產有點交代？
施：我一路都唔贊成派糖，如果派，應該好似上年咁派6,000蚊，一人一份，更符合公義。退稅、免差餉係巧立名目。
香港嘅大部份基層、中層都唔使交稅，呢啲措施只係益到少數人，搞iBond，傳媒話佢好，真係難以想像，iBond有幾多人買呀？益到幾多人？解決到通脹咩？畀啲投資者炒嚟炒去咋嘛。即使每人一份iBond益到幾百蚊，但你一人一份派錢有乜嘢唔好呀？
記：曾蔭權、梁錦松、唐英年、曾俊華，那位財爺最冇料到？
施：梁錦松料子較好，但撞啱偷步賣車……呢個世界大部份人都冇乜嘢料到，如果唔係點解咁難搵政治領袖。
公務員循規蹈矩，但香港政治問責官員好多都係由公務員系統出來，你哋（傳媒）都鍾意林鄭。但香港問責官員唔係政治家，畏首畏尾。