昆士柏流浪經過一輪增兵亢奮後仍然包尾；雖然佢哋3月賽程對手全係榜中下游，意味真正護級戰開始；但單憑救世主雷米重返正選名單，唔容易喺今晚作客越打越起勁嘅修咸頓身上言旋。同級對戰，莊家開出主W得1.68倍極辣，個人轉攻入球「大」及博冷嘅修頓勝[-1]。
有位曾經喺英超位居要職嘅本地足球評述員，喺上周球彩節目中，臨尾煞有介事向在旁嘅拍檔表示：「你信唔信有啲英超球隊專登部署降班搵錢？」雖說降班頭3年有撫恤金，但收入肯定遠遠不及留喺英超；而且降咗班絕大部份球會萬劫不復，韋斯咸前季成功一降即回升，皆因用銀彈搵英超大牌球星如路蘭助陣英冠，才能驚險喺季後附加賽決賽贏波，例子屬冰山一角。波友回望上季降班嘅英超隊保頓、布力般流浪同狼隊，𠵱家喺英冠分排10、11同22位，已知「地獄」難捱。其實，該評述員打過工嘅伯明翰降班後莫財等賣盤，上季仲有機會喺前列踢升班附加賽；今屆唔再降一級去英甲算執身彩。
近期本欄主攻昆士柏對家每得手，班波隊型仍無，陣中貴價兵多「昆」老細，到時降班自會各散東西；對手修頓早前爭議性踢走升班領隊艾堅斯換上西班牙人普捷天奴，唔似「部署」降班，前仗勇挫曼城認真出色，上仗夠勇氣作客同紐記鬥攻，末段輸一記12碼一個烏龍波致敗2:4。你有雷米復出，修頓會有10號仔加斯頓拉美利斯、同入波修頓必冇甩拖既翼鋒賓捷安擔正；對手亦都冇得再守，首選入球「大」兼取主隊勝[-1]。再取一注，明天北倫敦打吡熱刺鬥阿仙奴入球「大」，勝負難料，但雙方爭前4，打甩髀咯。
(下次見報日期：09/03)
文：蘋果波神