【本報訊】海事處早前突然以不符合公眾利益為由，決定撤銷向保釣船「啟豐二號」船東羅堪就發出的傳票，引起民間團體關注。人權監察批評當局「彈弓手」，「一時告一時唔告」，令人質疑背後有政治考慮，對法治失去信心；民陣警權關注組則斥當局嚴待一般社運人士，厚待涉國家主權的個案。
「傷害緊法治」
海事處早前向羅堪就發出傳票，指他於去年8月不顧船隻的情況和被要求停船的指示，將船隻駛離香港，違反《商船（本地船隻）條例》，原定本月14日到東區裁判法院答辯，但前日突然決定撤銷傳票。
人權監察副主席莊耀洸批評當局「彈弓手」，「呢單（當局）諗咗咁耐，深思熟慮先決定檢控，𠵱家突然唔告，究竟係檢控好求其，定係撤銷得好求其？係唔係有新證據話呢單嘢原來唔夠料告？定係有政治考慮喺度？」他表示，一個檢控決定不能「任意」，「短期內有咁大變化，會令人對法治好大疑問」。
民陣警權關注組成員沈偉男批評當局的做法不一致，「捍衞國家主權係公眾利益，咁點解示威遊行，唔係公眾利益？律政司有責任講清楚個原則喺邊度，要保持一致性，如果唔係就傷害緊法治。」他認為此事例正好反映當局拘捕一般示威者是有政治動機，「好似社民連嗰次喺胡錦濤訪港嘅時候，喺青馬大橋舉banner，竟然都用交通條例嚟告，點解會有咁大落差呢？」