《低俗喜劇》導演彭浩翔開宗明義，一來就承認「我係低俗」。賈選凝在藝評獎的影評中批評《低》片，彭浩翔在文中更是一文不值。彭浩翔自言很久沒有看影評，今趟再看只是為了回應報紙的提問。他寵辱不驚，完全不介意賈小姐的指控，奇怪的只是一篇電影評論，竟跟社會矛盾和中港關係拉上關係。彭浩翔自言拍《低》片很簡單兩個字──好睇，港片沒有拍教育電視的義務。
撰文：何永寧
內地人話「釣魚台是中國的，蒼井空是大家的」，那麼港片誰屬？
早前導演陳嘉上曾為港片下過定義：「顛覆直接，肆無忌憚諗到就可以拍」，彭浩翔執導的電影《低俗喜劇》傳承諗到就去拍的港片特點，不過近日卻被藝術發展局頒發的藝評獎金獎得主賈選凝評為「誤入歧途的『港產片』，用『低俗性』偷換了『本土性』」作指控。彭浩翔昨日接受本報專訪，直接了當說：「我承認我係低俗，因為我鍾意騾仔個古仔。當初我聽到杜汶澤同我講X騾仔嘅時候，就覺得可以拍成電影，咁有乜問題呀。電影唔係文藝作品而係娛樂片，冇義務導人向善，想要拍嘢嚟教育市民，你拍教育電視啦。你亦都要相信觀眾，唔會因為話睇咗套片，會走去嘉道理農場搵騾仔搞，同《教父》唔係教你入黑手黨，殺手片唔係叫你殺人一樣。粗口喺低下階層好普通，佢哋生活方式就係咁。 」
「影評冇一句評論套片」
彭浩翔強調香港電影雖然稱為港片，但服務對象不只限於香港人，他說：「套片喺美國、加拿大上映，睇嘅唔只係華人，上嘅係主流影院放映。喺加拿大、美國同韓國嘅影展攞獎，證明好多外國人都識睇。」導演由此引伸港片不是只拍給港人欣賞。訪問中導演一再強調沒有因為有批評而不開心，出道多年後已甚少看電影評論，他說：「啱啱拍電影都有睇，後來已經唔再睇。費事人哋讚你就鬆毛鬆翼，今次係因為要回應先去睇。基本上對賈小姐嘅評論覺得冇新鮮，你上網大把人有呢啲相同意見，奇怪係點解一個影評竟然冇一句評論套片。」
在彭浩翔眼中，喜劇就是要make fun，很難政治正確，影評借鄭中基戲中的暴龍哥角色，就扣帽子認為香港人看不起內地人，彭浩翔說：「拍喜劇好難政治正確，我哋喺戲入面攞嚟開玩笑嘅計有名校教師、中環律師、電影人、大學教授、竹升妹同鄭中基嘅暴龍哥，如果有啲人睇戲淨係睇到自己想睇嗰part，之後過份放大咗先會有呢啲睇法。喜劇係要搵啲人嚟玩，套《泰囧》都俾泰國人話歧視佢哋，其實係喜劇嘅必然效果。」
「好易觸動佢哋神經」
彭浩翔分析同一情節若出現在內地導演身上，可能又有不同效果：「好簡單，我早幾日喺微博寫話『近日北京毒霧，我返北京要唔要戴口罩呢」，其實好簡單，點知就有人喺微博留言，話你賺內地人錢，唔鍾意就唔好返嚟，我覺得有時好易就觸動到佢哋神經。又好似早幾日留言寫『銅鑼灣條街好臭』，事實係我成日會去時代廣場對開嘅的士站等的士，個坑渠好臭，其實呢件係渠務處嘅事，點知又俾人話我有所指鬧內地人，搞到兩班人喺我微博開火，最後我要刪文。好多呢啲事都證明有啲人過份敏感，對所有事都覺得有指向性。」
有評論指對彭浩翔的指摘源於覺得他要賺內地人錢，就要照顧內地人的感受和市場，將商業活動等同尊重。彭浩翔重申從沒講過港片只拍給港人看，為《低》片謝票時發現超過三成觀眾是來自內地的同胞，他說：「有位內地觀眾同我講，要排三個鐘隊落嚟睇戲，上返去又要排三個鐘，呢句話好過你讚我。簡單啲講拍片點會睇單一市場，你可以上到，我月球都去播，係你個制度令我上映唔到，唔係唔想播畀你睇。」
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/