「跟我一齊講尹光，尹光」，63歲的尹光專唱市井之歌，名副其實是香港樂壇低俗之父，然而，他的出身一點也不低下，父親是越南富豪，二世祖尹光在21歲前要乜有乜，其後越戰爆發，尹光為避兵役投奔怒海逃來香港，卻染上賭癮，跟名字一樣「搵」幾多都輸「光」，欠下周身賭債的他，更被收數佬上門埋伏，險過剃頭！
撰文：余燕儀
香港本土電影《低俗喜劇》因被北京的賈選凝一篇影評狂踩而再掀熱話，香港除低俗電影外，樂壇其實都有很多低俗歌曲，專唱市井歌表達小市民心聲的尹光，堪稱香港樂壇低俗之父，但原來他卻生於富裕之家。尹光是越南華僑，在當地出生，爸爸是越南富豪，經營戲院、溜冰場、漆畫和徽章等生意，含着金鎖匙出世的尹光，名副其實是二世祖，他說：「嗰陣成個越南數埋唔知有冇一百架汽車，我爸爸就有一架，細個我要乜有乜，日本一出新電單車我就買。」
被騙百両金
然而，好景不常，尹光21歲那年，因為越戰爆發，為了不想被拉去當兵，尹光投奔怒海逃離越南，整整搭了9日船，千辛萬苦才來到香港，並在這裏落地生根，他說：「當時我到咗當兵年齡被拉去當軍，爸爸畀錢搞咗我出嚟。」尹光為逃避兵役來香港，怎知走難都被連呃兩次，他欷歔說：「嗰時走難畀黃金，譬如收100両黃金，畀住50両定，連續兩次俾人呃定，第三次終於搭啱路，嚟到畀埋另一半定，手上只係剩番一隻重三錢嘅金戒指。」
由於越戰關係，尹光一家被政府充公資產，只留給每人200元越幣，尹光一下子由二世祖變難民，幸來港後投靠阿姨，他的阿姨亦是有錢人，當年住在百德新街，尹光可以繼續無憂生活，還在夜總會駐場唱歌，當上他喜歡的職業。不過，他來港一、兩年後，染上了賭癮，一度輸掉全副身家，尹光自嘲說：「好似我個名咁，搵幾多輸光幾多！嗰時朋友帶我去私檔賭牌九，輸到周身債，由70年賭到84年，賭咗14年先戒。」
一晚唱九場
尹光記得最深刻有次在澳洲賭錢，竟輸掉十多萬，回港後被收數佬追債，他說：「79年喺澳洲，一晚就輸咗幾萬澳洲紙，等於港紙十幾萬，當時一層樓都係十幾萬，要分期還錢，每月還四千，冇還兩個月俾人追數，有晚喺喜萬年夜總會返工，夜晚11點去到樓下，俾幾個人行住晒，我話：『嗱，唔好亂郁，整瓜我冇得還！』再搵人同佢哋講數，結果慢慢還番。」
孭住周身債的尹光，幸好靠唱歌走場賺錢，一晚最高紀錄走9場，才清還賭債，究意他後來怎樣戒賭？尹光說：「有日喺香港上海街賭十三張，同賭場借咗五萬蚊都輸埋，平時輸一萬幾千都容易借到錢還，嗰晚輸五萬，賭場話聽晚要還，我邊有錢還啫，真係好驚，我同自己講，求神拜佛如果俾我博得番，以後戒賭，點知真係俾我博番，所以由嗰晚開始戒賭，以後都冇賭過。」
拒自尋煩惱
問有冇後悔爛賭？尹光說：「冇，做咗就唔好後悔，改過咪得，欠債嗰段日子都係咁過，一個人煩惱自己尋，快樂自己搵，嬲又咁過日，唔嬲又咁過日，又唔使打靶，咪分期還錢囉，食幾多着幾多整定，我曾經買過幾層樓，其中美孚層樓115萬賣出，𠵱家值成800幾萬，如果冇賣出就發達啦。」
Profile
綽號：廟街王子
年齡：63歲
首本名曲：《荷里活大酒店》、《數波波》、《關人隱士》、《十四座》、《雪姑七友》、《少理阿爸》及《Mr. ONE》等
威水史：91年三度開紅館騷
場地：MM/H（皇室堡）
髮型：哈佛增髮技術中心
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/