記：《蘋果》記者
何：何喜華
過去六年的財政預算案，平均每年斥逾300億元推行一次性措施。新政府上場後照辦煮碗，退稅、免差餉、電費補貼，加上綜援、生果金出雙糧，派了330億元。
記：近年財政預算案焦點落在派糖紓困，預算案是否已變質？
何：如果經濟差，政府推出一次性措施，協助社會唔同階層度過難關，完全同意。但你派咗咁多年，變咗公眾期望，又冇膽企出嚟話唔再做。過去六年用咗1,900億，實則落到基層唔超過400億，其他散晒落中產。電費補貼住喺山頂都有，免差餉住半山都受惠，你估業主志在嗰幾千蚊？樓價升已賺唔少。
如果（政府）唔係亂咁使錢，投放喺教育、醫療度，相信好多中產更加歡迎。就算退稅，勉強可能慳到一萬蚊，但政府唔改善服務，你個仔讀書樣樣冇支援，要去直資，一個月學費都一萬幾千。安老服務收縮，中產都受影響，一家四口再加個七、八十歲媽媽、唔郁得，你要使幾多錢？
記：政府一直以「量入為出」作理財哲學，維持公共開支不高於本地生產總值20%，積穀防饑有何問題？
何：審慎理財避免香港成日有赤字，呢點我同意，但經過咁長嘅經濟周期，回歸15年，經過兩次金融風暴、沙士，我哋仍有好實質經濟增長，可應付支出，仲有3,000幾億龐大盈餘。睇番同樣經濟體系、人口結構嘅社會，日本（公共開支）用（本地生產總值）37%，韓國用30%，歐洲國家更去到超過40%。
財政預算案宣佈注資關愛基金150億元，援助N無人士；中產僅獲退稅、免差餉等，且差餉平均調高4%，打工仔未上樓先要捱貴租。
記：多年來財政預算案，公屋戶、綜援戶有糖派；但N無人士從沒受惠，為何政府一直不施以援手？
何：我聽到好多市民反對向公屋、綜援戶派多個一個月（公屋免租兩個月），其實核心問題係，政府夠唔夠膽檢討綜援制度、公屋政策？當綜援基數、加幅係合理，如果你話公屋水平應該更加低，就唔使每年做一次性嘅嘢，每次做個社會又分化。
對於N無人士，政府講法係點搵出嚟？公屋輪候冊上嘅人，冇住公屋、冇攞綜援，亦都係低收入，以前阻力喺鄭汝樺（運輸及房屋局前局長）度，一直唔肯提供（輪候冊資料），唔肯合作，因為私隱。佢哋荒謬到話所有紀錄係用打字機打字，唔喺電腦度，講出嚟都冇人信。（真正原因？）驚我哋搵到呢班人，行租金津貼政策。
記：你在社福界工作30年，一直為基層發聲，換轉角度，你認為政府應該如何協助中產？
何：好簡單，你令佢哋冇醫療、教育、養老嘅後顧之憂，同佢哋開創前路，唔係依賴你，係希望你提供機會，唔好側重大財團，𠵱家地產、金融、物流邊可以令中產自己發展？你要令自由市場有足夠空間，𠵱家地產霸權實在太犀利，邊個小商戶、中產可以喺尖沙嘴彌敦道、廣東道發展到？
梁振英首份施政報告，社協批評缺乏長遠扶貧政策，擺脫不了曾蔭權政府的影子；新政府首份財政預算案，社協指如同複製去年預算案。
記：你對新政府是期望過高，還是討厭曾蔭權政府？
何：我真係唔鍾意曾蔭權政府，呢個係事實。我對新政府當然有期望，因為佢（梁振英）競選承諾變革，譬如唔可以單靠經濟增長解決貧富懸殊問題，以前曾蔭權唔係，一直相信滴漏效應。佢（梁振英）落區時講過好多次小政府、大市場再唔適合面對社會挑戰，但你睇番𠵱家仍然維持小政府格局。佢話穩中求變，穩就穩，穩住好似以前一樣。
（有沒失望？）失望，唔係對佢個人失望。我感覺係好可惜，點解我哋嘅有錢人可以生活得好奢華，低下階層唔可以有逐步改善，睇到曙光、睇到希望？
記：回歸15年，經歷三屆政府四名財政司司長，如何評價各人？
何：梁錦松最聰明、最勇敢，死得最快。其他都係因循懶惰，即係好命水，冇乜長遠理念。曾蔭權好數口精，淨係睇盤數，對政府財務好清晰，你可以話佢係一個accountant（會計師），唔係一個財政司。（唐英年？）我懷疑啲嘢唔係佢做，佢係富家子弟，側邊啲人幫佢做晒。曾俊華就承繼Donald，好傳統，我成日諗起大宅門入面啲掌櫃，攞住個密底算盤度度度。