【銷情慘淡】
政府首日實施限帶奶粉出境令，藥房由以往擠滿「拖粉客」驟變冷清，生意應聲下挫如臨末日。不少藥房昨日半天賣不出一罐奶粉，東主指拖粉客銷聲匿迹，要減價散貨，「唔減好難去貨」。
限帶奶粉出境新招昨起生效，旺角一帶藥房奶粉銷情極慘淡，海健藥房東主王先生說：「細仔奶粉一罐未賣過，有內地熟客唔落嚟，走水貨嗰啲直情冚哂旗。」昨早奶粉商送來新貨，他愁對存貨，即時退貨，「退咗幾單，美素、A+，惟有見一步行一步，送嚟嗰啲唔收住。」
內地父母託親戚帶奶粉
旺角先達藥房負責人陳先生表示，原本有內地人預訂了六箱奶粉，昨日無來取貨，部份客人則託親友來港分批取貨。
國城藥房負責人林先生稱拖粉客銷聲匿迹，為促銷昨日全線奶粉每罐減價數元，如美贊臣3號每罐236元減至230元，美素佳兒1號由268元減至260元，預計下周要減少入貨。
有藥房東主指拖粉客減少後，可恢復正常賣藥及日用品的生意。內地父母則變招委託親人帶奶粉，廣州遊客陳先生及媽媽幫親戚買4罐奶粉，「親戚託到，冇理由唔幫手」。
平日有數以百計水貨客聚集的上水站及上水晉科中心外，昨水盡鵝飛，僅個別水貨客帶尿片、紅酒、紙巾等過關，運送奶粉水貨客少之又少。
另外，有2名內地水貨客過磅準備入閘，其中一人將行李及3罐奶粉上磅，工作人員即提醒她新例已實施，過量屬違法。
《蘋果》記者