【跑馬地→銅鑼灣】林峯同女友吳千語愛得癡纏，前日清晨佢哋先喺米蘭外遊返嚟，夜晚又急不及待甜蜜唱K，真係見少一秒都唔得。前晚11點幾，千語BB喺跑馬地出席電影《百星酒店》慶功宴後，同黃柏高及成班同事去附近酒吧玩，跟得男友林峯凌晨12點幾火速現身報到，同行仲有歌手韋雄。
唱K嘈被投訴
凌晨1點，半醉嘅黃柏高腳步浮浮走咗，之後仲警察到場，原來係附近住客投訴酒吧內唱K聲太嘈，唔知係咪令到最受歡迎男歌星嘅林峯感掃興，決定轉場。約凌晨1點半，千語BB喺黃百鳴個仔黃子桓及助手陪同下離去，問佢點解咁早走？係咪去第二度玩？千語BB笑而不答，坐保母車去銅鑼灣CEO，15分鐘後，林峯就同韋雄走，林峯同記者講：「辛苦晒，可以收工，早啲休息。」然後坐車去CEO會合女友。
大班人喺CEO狂歡，HotCha成員Crystal、谷德昭玩到4點幾先後離去，冇幾耐千語BB亦搭的士走，林峯繼續同女友玩前後腳，相隔10分鐘先坐車返屋企。
舊愛𠝹富二代
至於林峯舊愛李彩華亦不示弱，最近同富二代萬思維傳緋聞，佢哋曾合作拍內地劇《錯嫁》，早前李彩華去北京，萬思維仲去接機，兩個人又攬腰又搭膊，不過李彩華日前接受內地傳媒訪問就唔認拍拖：「我們只是好好朋友，拍完《錯嫁》大家很久沒有見面了，當天是一起朋友聚會而已，外界有了錯誤的解讀。」仲話唔知萬思維係富二代，上網睇新聞先知對方屋企有四個煤礦喎。
採訪：楊浩賢、吳耀輝
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/