除咗主席唐家成，證監會副行政總裁張灼華（Alexa）噚日都有參加春茗飯局，但見佢成餐飯都冇一嚿肉落肚，仲食得相當齋，最初以為佢學人一星期茹素一日，點知唔係，佢真係轉食齋。原來Alexa阿嫲同阿媽信佛，叫佢茹素好耐，舊年10月佢終於的起心肝全面戒肉，改食齋。
Alexa一向無肉不歡，聽佢講，一開頭要搣甩唔食肉確實好辛苦，成日好似唔夠飽咁，惟有食多兩啖飯填肚。轉食齋冇耐，佢都諗過放棄，不過最後都堅持得住，𠵱家對肉類已經冇乜興趣。
食齋仲帶來好多好處。佢發現，𠵱家成個人狀態弗咗好多，「我以前一到春天，就一定會有重感冒，但今年都好健康，暫時未病過！」照咁睇，大家不防考慮轉食齋來養生。