恒生銀行（011）前大班梁高美懿舊年退休之後，先後退任太古A（019）同埋和黃（013）獨立非執董職務，原先以為佢叠埋心水嘆世界，只做公職，點知佢都係離唔開財經界，繼舊年底做第一太平（142）獨立非執董，新地（016）噚日亦委任梁高做獨董。
揸近兩萬股新地
根據披露，梁高個人同家族分別持有新地1.52萬同3,000股，按新地噚日收市價120蚊計算，市值夾埋有219萬，似係買嚟收息居多。
梁高加入新地董事會應該唔會悶，事關滙豐舊同事葉迪奇同埋恒生前執董陳國威，分別係新地獨董同埋執行董事。梁高同陳國威共事嘅時間就短啲，當年佢過檔恒生做第一任女大班，陳國威冇耐走咗，估唔到隔幾年喺新地董事會重聚，都話呢個世界好細啦。