碧咸喺上星期六法甲首次為巴黎聖日耳門（PSG）上陣之後，到周三法足盃又有另一個第一次。呢場16強賽事碧咸首次為PSG正選上陣，表現唔差之餘仲依然有火，攞埋進軍法國球壇嘅第一面黃牌。呢場波PSG喺主場以2:0擊敗馬賽躋身8強。
巴黎聖日耳門啱啱先喺上周六法甲同死對頭馬賽交手，4日內第2次碰頭，PSG同樣喺主場送對手兩隻光蛋，前鋒伊巴謙莫域包辦晒兩個入球。
伊巴獨建兩功
碧咸喺周三比賽着上8號球衣正選上陣。37歲嘅佢寶刀未老，完全適應到比賽節奏，傳送依然有板有眼。場波都有啲火藥味，碧咸曾經幾次畀對手硬朗攔截倒地，一度導致雙方球員起哄；完場前碧咸被佐敦阿休踢跌之後同對方理論，結果兩個齊齊攞黃牌。
始終贏波最實際，心情靚靚嘅碧咸喺完場前滿面笑容地咁被調離場，佢喺賽後話：「我喺呢度有家嘅感覺，同一班超級球星做隊友感覺實在好好。」教練安察洛堤亦大讚碧咸：「碧咸依然有卡士，佢嘅傳球水準依然咁好。」
另外，今場波嘅入球功臣伊巴，因為喺歐聯16強首回合踩對手領紅，周三被歐洲足協判罰停賽兩場。