香港單車隊近年屢創佳績，獲市民認同之餘，亦有唔少廣告商睇中，好似嚿年退役嘅「老大哥」黃金寶，健康形象深入民心，噚日就為一隻健康奶粉拍硬照廣告。今個月14號舉行嘅傑出運動員選舉頒獎禮，盛傳會獲「終生成就獎」，當事人就笑住話同好多殿堂級歌手一樣，自己好恨攞番個「體壇金針獎」！
帶隊戰亞錦賽度牛一
曾拍過銀行、駕駛學院等電視廣告嘅阿寶，着上紅白Polo恤同白色波鞋，喺柴灣工廈為某品牌嘅奶粉影硬照廣告，面上化上淡妝嘅阿寶令人眼出一亮，一啲都唔似就快40歲，影足4個鐘，仍然笑容滿面又友善，吸引好多製作人員合照留念，佢仲非常識做，提醒大家廣告3月底就會出街，千祈唔好錯過。
阿寶下星期一就會第一次以教練身份，同世錦賽冠軍李慧詩、郭灝霆等十多位運動員，前往印度新德里參加亞錦賽，但應該趕得切喺13號返香港，慶祝40歲牛一，「媽媽年紀都好大，生日願望當然祝佢身體健康！」
願望再獲選「傑運」
另一個願望就係想喺14號晚嘅傑運頒獎禮攞獎，阿寶先後8次當選「傑出運動員」，其中2006、07同10年更獲選做「星中之星」。如果今年再獲獎，相信係運動員生涯嘅最後一個獎。有傳阿寶會攞「終生成就獎」，佢就笑笑口咁話：「樂壇頒獎禮就有『金針獎』，電影界就會表揚甘草演員，可能大家到時又會叫我做『體壇金針獎』得主！」
仲記得「歌神」張學友喺1月攞「榮譽獎」嗰陣，全場企晒起身拍掌致敬；而「亞洲車神」阿寶約20年運動員生涯成績輝煌，係香港歷來第一位世錦賽冠軍，仲贏過3面亞運金牌、3屆全運冠軍，同參加過5屆奧運，成為本地體壇icon。若果當晚獲得「終身成就獎」，估計灣仔會展全場賓客肯定會拍爛手掌。
