伯南克連續兩日在國會上為量化寬鬆政策辯護，美股就升足兩日，道指三扒兩撥又破頂，真係不得不服伯南克口術的威力，當然，美國樓市數據的好轉，亦成為另一重推動力。
老實說，提早退市只是用來震倉的藉口，美國早已患上量寬依賴症，毒癮又點會咁容易搣甩，況且之前都話退市要待失業情況明顯改善，暫時實在好難想像可以短時間達成。
雖然好多人批評量寬製造通脹，又製造資產泡沫，不過唔怪得晒伯老，正所謂「屁股決定腦袋」，他的位置就是負責利用貨幣政策配合政府，美國經濟雖稱不上回復繁榮，但叫做避過了以前市場不少人講的「雙底衰退」，實不可抹殺他的功勞，縱有人話將來美國人會為此埋單，而我諗佢都唔係唔知，但現時個個都話要活在當下，今日都未做好，點諗咁多未來呢？
港股受美股帶動，加上A股反彈逾2%，一下子彈回23000水平，這下挾倉實在兇狠，個股亦升得全面，大家應該會自動反應問「見底乎？」筆者唔夠膽妄下判斷，始終一日不能作準，之前提及大市從高位已回落不少，就算恐慌都唔係時候，前日股升市唔升，亦預了會有反彈。現階段自己或會考慮吼位沽空，但這計劃會隨時改變，因為升得咁勢兇夾狼，若升勢之後能持續又可以高收，自己都未必沽。
揸強沽弱 致勝之道
另外，牛市中沽空風險不小，所以注碼控制非常重要，若然認為風險高，不如慢慢儲股票，若出現先前所說的恐慌性拋售，才大手加注。至於先前揸重貨不願沽的朋友，不如趁此反彈減點倉，尤其係那些升市跟唔上，但跌市永遠有份的股票，鋤強扶弱是一種美德，但在股票市場裏，揸強沽弱才是長遠取勝之道。
張士佳
元大寶來證券（香港）業務及商品發展總監
與曾卓鋒（元大寶來證券（香港）客戶經理）聯合執筆
（逢周三、五刊出）