美國連續兩日公佈優於預期的樓市數據，市場開始吹風謂美國樓市見底，睇雅虎財經近兩日訪問美國地產界人士的確亢奮，以相當肯定口脗謂今次真係見底，而且回升幅度會相當吸引咁話。
有利沙發定單增長
美國地產跌了好幾年，稍為反彈並唔出奇，但客觀效果是投資者即時沽債買股，因地產好轉後，即使未即時加息，QE亦會中止，到時債息低無可低的美國國債由誰來接？因此這兩日美股急扯是資金的即時反應，假如成勢，美股隨時升到你唔信，債市龐大的資金一流出來，掃乜都升到飛起。
不過針無兩頭利，升升吓又會話估聯儲局退市及提早加息，這對港股及港樓影響特別大，在美股上升之餘都要小心。炒美樓市復蘇，傢俬股敏華控股（1999）是其中一個選擇。敏華產銷休閒沙發，最主要出口市場美國佔收入54%，內地則佔28%。旗下「芝華仕」沙發具收納腳椅及轉動功能，儘管公司標榜產品豪華時尚，但銷美的沙發價格一般較對手低，有一定優勢，隨着美國樓市回穩，有利定單穩步增長。
敏華截至去年9月底，中期收入增長13%至24.01億元，當中美國市場增加20%至13.15億元；純利則勁升54%至2.19億元，主因材料跌價帶動毛利率上升。綜合市場預測，2013及2014年度PE分別13倍及11倍，現價仍然抵買，以花旗最近出報告之目標價9元計，上升空間約22%。
歐陽風