立法會主席曾鈺成早前表明，希望明年帶全體立法會議員到內地交流後，搞到公民黨毛姨姨囉囉攣，噚日仲帶埋佢89年上京採訪六四事件時用嘅陳年回鄉證，同記者分享內心憂慮。
毛姨姨89年時仲係法新社記者，當年用回鄉證6月3日入境中國後，由於公司怕佢危險，急召佢返港，但毛姨姨就用咗英國護照出境，令到佢本回鄉證，一直只有入境而無出境紀錄。
佢2000年試過到訪內地，探當時做交換生嘅囝囝，但當年都係用英國護照；直到做咗立法會議員，要放棄英國護照，毛姨姨自此未返過內地，家陣佢有啲擔心，驚現時仲唔知可唔可以申請番本回鄉證喎。