北京女賈選凝劣評《低俗喜劇》竟然獲獎，唔單止引起中港矛盾，連啲評判嘅眼光都備受質疑。眼見有啲人咁接受唔到低俗，導演彭浩翔同男主角杜汶澤就再次發功，話由於近日香港文化蒼白，所以佢哋決定喺聽日、後日，會去淘大影藝，將呢套戲再次低俗地上映兩場咁多，造福更多香港同內地同胞。
阿澤係facebook話，到時佢同彭浩翔都會現身戲院，向觀眾謝票。最抵死係，呢兩場戲嘅收入，會全數撥捐關注精神病人嘅慈善團體。噢，唔知邊個會受惠呢？兩場戲分別喺明日9：50pm同後日4:00pm上演，今日下晏有飛賣嘞。彭浩翔話，今次係做善事，唔會特別留飛俾賈小姐。杜汶澤就覺得，做電影憑良心，相信係好嘢就拎出嚟。如果今次場次爆晒，會諗下希望有時間再上。