期指結算後，港股出現典型技術反彈，好友全程挾上，仲有大成交配合，似乎氣勢番晒嚟！淡友平倉食糊後刻意示弱，一般是候高再建淡倉，配合壞消息發動另一次攻勢。魏力昨聽到唔少人低位打靶後，昨又飛身撲入市，風險其實甚高。保留資金，待市況較明朗再衝方為上策。
踏入業績期，盈喜股紛紛起動，整固近兩個月的巨騰國際（3336）大成交爆上，高見4.25元，創52周新高；收報4.20元，向5蚊目標進發。早兩日推介的信利國際（732）強到無倫，創3.05元三年收市新高，進取者可小注跟進。
公司陸續出去年度業績，唔少睇落盈利大倒退，但拆開逐季睇，其實第四季都有驚喜，今年盈利大翻身機會甚高，金風科技（2208）正是其中之一。公司去年「面數」大跌75%，賺得1.53億元（人民幣．下同），但睇深入啲，去年第三季蝕3,355萬元，首三季都只係賺3,852萬元，即係第四季就賺1.14億元，直頭就係V形大反彈！
德銀最新報告指風電行業經多年整合後，今年是盈利轉折點，預期金風定單及產品售價將恢復增長，現價PB得0.6倍，顯然未反映盈利改善的因素。睇埋圖，金風蓄勢突破杯柄形態，戰友可待升穿4.52元阻力追入，量度升幅睇6.60元，跌穿4.10元止蝕。
魏力
http://www.facebook.com/2012jason