鬍鬚曾一句「你有你嘅生活，我有我嘅忙碌」，真係反映佢同小市民天各一方嘅心情。噚日佢上立法會簡介預算案，左中右三路議員都大搞二次創作，金句變成萬能key。
工黨李卓人作品：「你有你水深火熱，司長我有我hea住」，前一句道出基層生活苦況，後半句插爆曾俊華打工仔心態，對比強烈，係冠軍之選。
升呢成為大師嘅林大輝亦改得唔錯，佢話「你有你中產生活，我有我中小企嘅忙碌」，可惜後一句只係幫中小企發聲，唔夠完美。
點好過工聯會王國興嗰句「你有你施政，我有我財政」，聽完都唔知佢想講乜。唔怪得鬍鬚曾都寸佢話，喺社交網站睇過一啲改編歌詞，「比你創意高一啲，寫得實在唔錯」。
