財爺一句「我都係中產」熱爆全城，大家𠵱家先至知道，鍾意飲咖啡同睇法國電影就係中產，唔關人工事。證監會主席唐家成（Carlson）平日食飯鍾意飲番杯紅酒，佢雖然唔似唐唐咁，藏品多到可以攞出嚟拍賣，但呢種生活態度肯定都係中產啦。
還原再還原 方知劉夢熊
舊年特首選舉時，Carlson投票畀CY，噚日證監會搞春茗飯局，大家少不免要佢評論CY上場後表現，當提到尖啤爆料單嘢，Carlson唔知真唔知，定係假唔知，完全唔知尖啤係乜東東，要人「譯」番"Dream Bear"，再「譯」返做夢熊，佢先知道大家講緊乜嘢，睇來Carlson真係要睇多啲我哋〈財圈人語〉了。
查實𠵱家除咗短訊用語，網上討論區同社交網站興起後，亦多咗好多「音譯」流行用語，好似粉絲、濕平、拉闊、思歪等等，就算唔講唔用都要識，唔係點同後生仔溝通？
不過，無論係唔係中產、識唔識潮語，舊年底榮升外公嘅Carlson，同普通嘅外公一樣，一見到人就攞部手機出來，分享吓佢位小孫女幾咁可愛，相中Carlson抱住約三個月大、肥嘟嘟嘅Sophia，Carlson笑容燦爛。快樂就係咁簡單！
李華華
mailto:[email protected]