話啲央行夾埋一齊做嘢真係冇錯，美國聯儲局主席伯南克暗示無意收水，內地人行又做逆回購詢量，反映中美原來都唔想收水，刺激港股噚日急升443點，唔少之前沽咗貨嘅投資者，想追都追唔切，唔少急升半成甚至一成個股。問題係究竟𠵱家應否追貨？
晉佳堅持睇法，認為港股中線升浪2月初已完結，𠵱家進入整固期，22445好可能只係短期低位，大市反彈唔會明顯升破之前高位23944，之後有機會殺落更低，唔排除未來三兩個月內殺落21000，波幅大，但係都係chok上chok落。
雖然今轉反彈可能有多1000點水位，但一定唔似去年9月至今年2月頭咁好玩。迎接chok市就要買啲中線揸得穩陣嘅股，最好係股價升得多，跌得少嘅強勢股。
目標價13.5元
中國建築（3311）2月中升近11蚊歷史高位然後整固，調整完都喺10蚊樓上，噚日急升6%，一支大陽燭又番上去10.88元，等如喺高位至今冇跌過，股價跌得少，升得多，相當強勢，符合上述選股原則。
中建築去年上半年營業額升48%至104.88億元，純利升35.8%至8.87億元，每股盈利24.73仙。去到業績期前，券商平均估中建築去年每股盈利56.1仙，即下半年每股盈利較上半年大增27%，表現相當強勁。公司向來盈利可測性較高，加上業績甚少令市場失望，所以去年meet到券商預測實在正路。咁樣一計，市盈率19.3倍，對於增長理想嘅中建築，估值唔貴。券商平均預測今年每股盈利71.1仙，預測市盈率降至15.3倍，形成未來幾個月股價仍有上升空間。
睇遠景，習李政權強調要為人民帶嚟美好生活，未來要改善生活，基建、起樓需求唔會細，市場認為內地建築行業增長高峯期就嚟過，晉佳就覺得未必要咁悲觀，至少股價咁強勢，反映中建築隨住盈利一直增長，估值將會持續膨脹，要未來幾個月繼續穩步上揚，難度唔高，以今年市盈率19倍計，幾個月內有望升上13.50元。
晉佳
本欄逢周一、三及五刊出