林鄭月娥（圖）唔只好打得，讀書更加得。噚日佢宴請傳媒去官邸風花說月，席間講起那些年，自稱基層出身嘅佢話卅年前啱啱做AO冇耐，獲政府資助去劍橋讀書；第一次搭長途機，心情相當興奮。入鄉隨俗，佢學同學仔踩住單住四圍走，點知炒車，斷腳入院一個月，認真黑仔！更離奇嘅卻係佢近乎休學一個月後，竟然考到全班第一，聽到在場行家嘩嘩聲。
林鄭效力梁班子後瘦到得番棚骨咁滯，唔少議員都戥林鄭擔心；林鄭卻自稱因為家族遺傳血糖高，所以on diet戒食澱粉質啫，唔係為誰消瘦，仲話每兩星期就打兩個鐘羽毛球減壓。
被喻為「局長奶媽」，又難怪有壓力嘅，但林鄭噚日對此稱號卻笑笑口話，好耐冇同其他局長一齊出現嘞喎，暗示冇做奶媽好耐。至於不時被傳有plan B，林鄭堅決話「唔係」，但冇直接回應佢同鬍鬚曾係咪同CY唔妥，話偶有意見分歧好正常啫。