曾是港英政府精英的財爺唔知係咪有職業倦怠症，預算案新橋欠奉，仲學埋中學生咁抄歌詞，唔派糖畀中產又要扮自己友，點知食晒檸檬，中產仲同財爺唱《天各一方》，噚日再講法國電影同咖啡的中產生活態度，Samantha只想對財爺唱《沉默是金》。
預算案中，「計錯數」每年俾傳媒例插，雖然在市民角度，佢未必係一個好司長，但從員工角度看，財爺非常識撈，預咗蝕錢最後有盈餘，罪名僅僅係計錯數；但預有錢賺到頭來要蝕，就要俾人問責。
不過心思細密的財爺，前日預算案竟然在記者會上說「明年經濟比今年稍為好些。」財爺和陳德霖一向係大淡友，每次都歐債危機、加息周期不離口，這等於最後一名淡友轉軚：凶兆！
成日話環球市場多變難測的財爺，點解你唔堅持多一陣？企硬一邊，總有一天會啱。若果唔轉軚，財爺你只是一名淡友，但家陣你轉咗軚，萬一環球有乜事，你就係照亮萬家燈火的「明燈」！
Samantha
本欄逢周一、三、五刊出