今日路經報攤睇過港報頭版，只有個別以財政預算案為A1，最高銷量嗰幾張大報全以其他新聞為題，這份新政府首份的預算案「被冷待」已成定局。然而相對啱啱嗰份施政報告的熱「鬧」，這位唯一可以冧莊再做的司長已經飲得杯落，亦難怪在前天的記者會，當被傳媒問及他對中產了解不夠及照顧不足時，他竟能好整以暇、神色自若咁話，自己亦都係中產，唔相信做得唔足夠喎。過後當被記者追問「中產」定義，財爺都係用手指番自己，我估若然係黃宜弘用開嗰隻，大家會好過啲囉。
坐視旁觀 大講風涼話
薪津年計成500萬，仲有司機座駕同官邸，咁都仲算係中產？失禮講句，以收入計，我呢個上市公司主席仔真係連中產都不如！及至晚上現身答問會，財爺再行「解畫」，自己亦係生於中產家庭，既是專業人士，子女也是中產，個仔喺酒店做嘢每日要企十幾個鐘，因此他了解到中產的生活情況。我唔會懷疑以上內容嘅真確性，正如好多鉅富隨口都噏得出發迹前身處嘅悲慘世界，同埋點樣為咗啲富X代能知疾苦，特登安排佢哋去體驗（頂多三、兩個禮拜嘅）辛苦工作，或只係去咗啲落後地區扶貧。
不過，敢問財爺家陣你使唔使為每月供完樓就掹掹緊嘅財政狀況而擔心？仲有你個仔上咗車未呀？啲首期係咪你畀嘅？你份退休金都不知多過幾多真係所謂中產家庭嘅總收入，咁佢哋以後係咪靠「強迫金」，同到時都唔知仲有冇嘅特惠生果金就可以過活？我知你曾經都幾中產，但今日恭喜你力爭「上游」，更進一層，比上縱有不足（唔通同誠哥比咩），起碼位列全港最高收入嘅半成人，比下更是綽綽有餘。
箇中原因，我諗你都準備好標準答案，正如你份份預算案估錯數，不外乎就係歸咎香港係外向型經濟，受外圍市場影響至深，啲非經常性嘅收入難測……但係難估嘅你又斷估唔到；至於社會貧富漸趨兩極，越見懸殊，連帶中產亦受牽連，早成氣候，看在你眼。中產下流，社會M型化已是全球先進地區的共同趨勢，為政者坐視旁觀，或者淨係識飲咖啡睇法國片，置之不理卻是瀆職失責。食祿分憂，正常不過，中產納稅養了你這個中產極品，唔為「中產下流」施予援手，卻還在旁大說風涼話，「下流中產」矣。
盧先亞