財爺預算案細節冇乜值得討論，反而佢明刀明槍白紙黑字訂下公共財政大原則，在政治上與梁振英及梁粉們對着幹之意味，呼之欲出。
外邊批評低估收入、高估開支計錯數，大佬，過去30年都年年如是，刻意用最保守方式低估收入係為咗壓低政府經常開支，量入為出，係一個happy problem，有乜唔妥呢？
鬍鬚曾話人哋批評佢保守，佢當做讚美，好多人以為佢寸嘴，為拗而拗，實情係對政務官而言，「保守」正是金科玉律，政務官最憎民粹政客，猛開空頭支票，找唔到數就諉過於人。
預算案玩保守 懶理狼英
政務官對擴張經常開支高度戒備，任何新建議呈交財務科討論，一個小AO都會審犯咁審，質疑新開支係咪必須，有否變成先例，令其他服務有例可援，提出同樣要求。好多時政客局長都拗唔過政務官，因為成棚政客根本冇一套核心執行綱領，亦冇民意授權，政務官一套「保守」哲學，理據簡單，邏輯清楚，就如葉問口中「詠春三件頭」，將政客花招一一拆解。
振英上場後一直試圖繞過政務官，去實現大計，一方面派福利提升民望，另一方面奪取產業政策話事權。佢如意算盤係另立山頭，以中策組為大本營，收回研究資源，再分配予自己友，為梁粉政策在學術界造勢。
另外通過中策組介入公職任命，委任同聲同氣梁粉出掌大小法定機構，提出新政策作呼應。成立經濟發展委員會、金融發展局，加上原本安排出任副財政司，後因重組失敗，改任發展局局長的梁粉陳茂波掌地政，一切部署均是為奪財政司權。
林鄭早已經投靠梁振英成同路人，在政府高層能代表政務官價值觀，就只剩下財政司。
曾俊華今次不再和稀泥，開宗明義將政務官一套保守理財原則寫低，重回舊日自由市場主導一套，將「適度有為」置之不理，一於睬你有味。預算案出台後當然俾輿論砌冇料到，但卻贏得政務官支持。
當梁振英民望長期無起色，急於派福利，而梁粉金主又要他推出政策優惠找數埋單時，兩人角力會更進一步，梁肯定會將施政失敗責任推到鬍鬚曾身上。表面上梁大權在握，有中聯辦背書佔上風，但曾背後也有北京支持，鹿死誰手，真係話唔埋！
添馬男