【灣仔、中環】娛樂圈巨星殞落嘅年份尾數都係「3」，離世10年嘅張國榮同20年嘅陳百強今年都有悼念活動，6月30號就係Beyond靈魂人物黃家駒逝世20周年，據知製作人丘亞葵希望幫Beyond搞30周年紀念演唱會，佢承認同黃家強、黃貫中傾過都冇問題，可惜葉世榮意向不大，令紀念騷變冇影行動！
「嚟緊搞演唱會」
咁啱家強同世榮前日都喺港島區出現，雖然Beyond騷搞唔成，但據知家強今年會開個人演唱會，仲簽咗畀任賢齊嘅大岳娛樂，前晚7點半，寰亞集團主席林建岳喺灣仔請藝人食飯，小齊、周麗淇、梁漢文同蘇永康都有出席，當然唔少得新加盟嘅家強，問佢係咪約咗林建岳食飯？家強大方承認：「係，有啲嘢傾，嚟緊可能搞演唱會。」問佢知唔知世榮返咗香港？家強話：「冇見過。」
而世榮同嫩妻張偉鈴返咗香港，前日5點佢哋十指緊扣喺中環行街，做過模特兒嘅老婆足足高世榮一個頭，世榮戴黑框眼鏡，冇乜人認到佢，之後揸平治座駕同老婆離開。
採訪、攝影：黃曉程、羅德光
想睇更多首輪猛片介紹同預告片？《一台戲》為你網羅最新電影介紹及影評↓↓↓↓
http://hk.movies.nextmedia.com/