港股捱過期指結算，但執筆之時，美國兩黨仍就自動削赤方案拗數，有乜冬瓜豆腐，環球股市肯定要捱多一刀，到時莫講話收水，隨時要加碼救市，加上意大利國會重選事在必行，以及阿爺加碼收緊銀根，3月又係業績期，可謂風高浪急，戰友炒作務必小注，控制風險。
以黃金比率量度幅度睇，恒指起碼仲要調整約800點，至21700水平，但細心逐個板塊觀察，發現唔少早前強勢的二三線股已調整完成，蓄勢爆發新升浪，頁岩氣、燃氣及光伏股均見此現象，以估值及盈利爆發力而言，興業太陽能（750）可睇高一線。
先睇圖，恒指日前已失守50日線，反映中線轉弱，但興能上月底創9.70元新高後，回落至50日線7.80元已跌唔落，昨日突破下降軌及10日線，9RSI回升至50之上，成交亦配合向上，可視為轉勢訊號，現價小注買入，先睇9.70元高位，抽穿再加注，中線睇11蚊。
興能為光伏建築龍頭股，屬下游產業，光伏組件產能過剩，反而有利集團以低價大手採購原材料。中金最新報告指，受惠金太能計劃及補貼措施，興能今年裝機量將飆至7至8GW，按年大升2.5倍；純利增長98%至6.18億人仔。以每股盈利0.98元人民幣計，2013年預測PE僅7倍。
http://www.facebook.com/2012jason
魏力