北韓、美國兩國關係緊張,美國竟然派前公牛「籃板王」洛文去做親善大使?唔係,原來一向行事古靈精怪嘅洛文,最近同美國電視台HBO合作拍片;周二佢就同幾名哈林籃球隊隊員,去咗北韓平壤開籃球訓練營。今次仲會同當地精英籃球員比賽嘅佢,到埗時好似有啲緊張,又同記者講「希望一切OK啦。」不過,今次同北韓「籃球外交」,洛文一開始就擺烏龍,喺twitter話唔知有冇機會,同以一首《江南Style》紅爆全球嘅南韓歌手PSY見面;後者見到之後,即刻上洛文twitter留言糾正洛文錯誤,希望「籃板王」喺平壤唔會講多錯多啦。