港交所（388）舊年大手筆收購倫敦金屬交易所（LME），股東有冇得益，有排都未知，不過LME阿頭Martin Abbott就先袋一筆。
年薪隨時過千萬
Abbott舊年12月6日加入港交所，做環球市場科聯席主管，返工唔夠一個月就袋走90.4萬，當中包括38萬薪酬同46萬現金花紅。照咁計，包埋福利、退休金，佢年薪隨時過千萬，拍得住行政總裁李小加。
港交所舊年僱員費用11.78億，增加14%，李小加解釋，收購LME同架構重組後，一闊三大，人工開支多咗，不過佢哋已經相應減派花紅。佢舊年收少96萬花紅，令全年薪金總額減少5%，但都有1,533萬。