港股稍事回氣，新股就馬不停蹄，當舖股靄華押業（1319）噚日招股。資料顯示，靄華為全港最大典當店集團，擁有12間當押店，2011年貸款總額達5.1億銀，佔行業總貸款金額9.4%，第二至五位嘅總和都只係9%，優勢明顯；2012年錄得純利3337.6萬銀，增長42%，招股市盈率介乎9至11.7倍。近三年貸款淨息差平均近40厘，利錢豐厚，近年更開始涉足按揭貸款業務，可謂食正政府收緊按揭條水。對於賊贓問題，管理層表示已購買保險，損失最多一成，加上有黑名單在手，中招機會不大。靄華市值不足4億銀，與殼價無異，集資最多僅9,800萬銀，要炒上話都冇咁易，從供求關係睇，小注認購無妨，應可收刀仔鋸大樹之效。
個股方面，噚日燃氣股有勢，相信同長春市大幅調高天然氣價四成有關。華潤燃氣（1193）業務遍佈全國20個省市，肯定受惠加價潮，噚日炒高近3%，成功補回去年11月嘅下跌裂口，再上一層樓難度不大。
唐牛