「股海明燈」沈振盈大師轉運呀！沈大師以前叫買邊隻股，嗰隻股十居其九同佢唱反調，但自從佢今年玩咗《爽報》「300萬爽組合」之後，神奇嘅事情就發生了，尤其今個月，按噚日收市價，佢個組合暫時領先，佢重倉嗰隻宏通（931）收市後仲發盈喜，今日埋單計數幫晒手。
3月變陣全攻型
沈大師沾沾自喜咁話，幫自己算過八字，舊年開始轉運，個人變醒啲，講嘢準啲，2月睇來冇得輸，佢打算3月變為全攻型。大師預計，3月尾基金季結，個市呈先低後高格局，佢會一路買指數熊仔做對沖，低位買正股，當確認個市轉勢就側埋一邊做。
佢仲講到明，睇住對手周顯來玩，事關周顯專買潛在爆升股，做完功課，酌量跟佢買一隻股，先唔怕被佢放甩。聽佢講到口水花四濺，似講馬仔，真係好想贏到肥佬黎啲錢喎。