剛結束的渣打馬拉松，有逾百名跑手在開跑四分鐘前才到達起跑區前檢查站，被禁止參賽，與大會人員理論；甚至有人要求大會退款或明年讓他們自動獲得參賽權。主辦單位澄清賽事規則已列明所有參賽者早上7時30分後不能前往起步區，今年已額外延遲逾20分鐘「截龍」，因每年也有此情況，今年特別在賽事規則中提醒參賽者。投訴者認為，大會在號碼布上列明此訊息才可避免再有此不公平情況。
我這個局外人都知參賽須知有寫明每個項目的規則，包括起步及集合地點時間，明明自己唔啱，大模廝樣遲到仲好意思咁大聲？還要投訴要求賠錢？話大會錯？的確係事實，錯在有規矩不依，執行不嚴，才造成這樣的「窘」局，抵鬧！既然寫明0730前集合，逾時理應不候，立即落閘才是。就是天真地以為體諒寬限的「緩衝」可以息事寧人，結果反因證據確鑿被遲來了的參賽者「挑機」，大大聲聲理直氣壯質問「點解0755你都仲放人，我哋差兩分鐘就唔入得？對我哋咁唔公平！」更精警的是，有遲到者大聲夾惡鬧：「你哋唔係第一年有咁嘅問題，年年都有咁嘅問題！」工作人員證實的確年年如是，總有一批參賽者為了同樣問題爭拗，出現混亂局面。即是有參賽者利用「漏洞」明知故犯，主辦單位闊佬懶理未有吸取教訓，作出相應措施堵塞改善，兩個都爭唔落，一樣攞嚟搞！
莫講參加公開考試，簡單如學生返學，打了校鐘才到就是遲到，要受罰要記手冊邊有情講？又或者搭飛機火車，講明幾點開前幾多分鐘前要到，遲到一切後果自負，逾時肯定不候，下回請早，講完！這些惡人，平日上班工作，究竟會是甚麼樣的人？
張慧敏
http://www.facebook.com/HKcareerdoctor