與律師Ａ約吃午飯，搞咗前後一個月，大家卒之在文華酒店頂樓Pierre見面，呢度以分子食品著名，一道名菜就係鵝肝湯，點知律師Ａ話最近喜歡食齋，雖然未完全係素食人士，唔飲鵝湯咯。佢唔制，左丁山就試吓啦。律師Ａ家人信佛，影響所及，佢亦閱讀佛經，深感在法律界、金融界營營役役，有時碰上技術難題，傷吓腦筋，還算可以解決，但若與政治扯上關係，往往由簡單變得複雜，由複雜變成對抗陰謀，就神仙難救，在如此時刻，讀吓般若心經，反覺一切都是化外物，不必太緊張，精神開始鬆弛，血壓不會高升。
政治之事，不惹為妙，最怕政治找上頭來，欲避無從。律師Ａ既然話喜歡食齋，左丁山雖是門外漢，介紹佢返回母校「一念素食」Bijas試吓。佢問：「邊間母校？女拔邊度會有素食？」左丁山話：「港大呀，在西部校園！」律師Ａ又問：「港大幾時有個西部校園呀？」吓，咁都唔知，左丁山唯有扮徐詠旋，向呢位港大出身嘅律師講解西部校園一番，教佢如何到「一念素食」食齋。
隔咗兩日，著名佛教徒簡文樂自辦「皇家博物館」（Imperial Museum）在山頂纜車站聖約翰大廈一樓開幕，由民政事務局局長曾德成主持，因簡文樂係匈牙利駐港榮譽總領事，有不少外國領事到場。簡文樂係佛教文物（如沉香木觀音）發燒友，收收埋埋不知有多少，儲存在工業大廈貨倉，佢又藏有大批歐洲十七至十九世紀宮廷傢俬與飾物，有意公諸同好，於是在中環租用寫字樓，闢作博物館，分批展覽，佢話簽下一紙五年租約，租金二千萬元，但全無收入噃，咁嘅蝕本生意都肯做？簡文樂笑騎騎，勝在蝕得起，蝕得開心啫！佢着住件大紅長袍接待嘉賓，成個慈悲笑佛咁模樣，唔怪得佢隻馬叫做「伽羅」。左丁山在館內行走一遍，印象最深者就係沉香，以前未試過見到咁多沉香木雕塑。簡文樂話以前中山叫香山，東莞叫香莞，香港就係香港，根本珠三角一帶便以沉香著名，故此香港應該種多啲沉香樹，發揚本土文化。唔，中文大學近火車站就有一棵沉香樹，中貿林每次返崇基就去望一望。點解咁緊張？佢話好驚俾人偷咗去喎！