今日是Angelababy的24歲生日，前晚她出席公司春茗，贏了現金獎兼獲最勤力員工獎，相當幸運。Baby謂踏入蛇年由年初一開始每天開工，更謂今天生日正日也要拍廣告，生日願望是希望今年搵夠九位數及買樓，也希望男友黃曉明的腳傷早日康復。
女模Angelababy、熊黛林（Lynn）、周汶錡和姚書軼等，前晚在中環出席所屬模特兒公司Style的春茗，經理人Kim更為Baby準備生日蛋糕，預祝她今天24歲生日，Baby即場與同樣是2月生日的王菲造型師Titi Kwan一起切蛋糕，之後Baby抽中現金獎及獲頒最勤力員工獎。
晒命曉明走唔甩
踏入蛇年Baby指工作未停過，她說：「年初一開始搵錢好好意頭，今年又係24年來第一次喺工作中度過，正日生日都要去深圳拍廣告，即晚飛巴黎睇騷，中間返香港拍廣告再去巴黎。」蛇女Baby今年犯太歲，她說：「仲未攝太歲，犯太歲代表有變化，唔一定衰。」問她指變化是否蛇年會結婚？她說：「唔會，我想買咗我住緊間屋。」
問到男友黃曉明可有表示？Baby說：「我冇諗過要收乜禮物，我都叫朋友唔好送禮。」問到曉明可有趁機送鑽戒求婚？Baby說：「戒指我都買得起。」可會考慮訂婚，mark實男友？她說：「呢個世界有啲嘢係你就係你。」內地可有富二代追求？Baby即說：「我係一個好……人，可以自己努力搵錢，今年目標搵九位數字，希望用八位數買屋。」生日願望包括曉明早日康復？Baby即尷尬說：「希望佢快啲好番。」另外，Baby出席春茗前，下午先與一班粉絲在Baby Cafe慶生，粉絲更送上海綿蛋糕生日卡。
此外，前晚同樣抽中現金獎的Lynn，也希望今年置業，她說：「已經搬過五次屋，要努力儲夠首期。」為何不直接搬到男友郭富城家中，她說：「我想買間屋近海邊同埋同屋企人住。」
Lynn反口冇話嫁
早前Lynn稱想今年結婚，但城城表示想專心工作，Lynn即說：「我冇講過，工作緊要啲。」近年藝人時興在演唱會求婚，問可希望城城在即將舉行的演唱會示愛？Lynn說：「我接受唔到，我諗我多數會走。」
採訪、攝影：顏英儀
