網上瘋傳「公主病奇葩女」片段，話說有個強國靚女上節目，希望同前男友箍煲，點知被踢爆患有公主病，唔止每月要有拍拖、接吻紀念日，甚至連男友媽媽入院，公主都堅持要先送佢返屋企。
公主病從來唔係先天，相信奇葩女自幼在溫室長大，家人當佢公主咁寵壞。無他嘅，強國「一孩政策」下，有邊個父母唔係當仔女係金叵羅，集中精神、資源去養大王子、公主呢？
不過盛傳阿爺為防止人口老化，考慮於下月召開嘅兩會公佈放寬一孩政策。查實去到2030年，內地勞動人口將大減，同時社會老人開支增加，到時根本唔夠人力資源支持經濟高速增長。假如今年起放寬，呢幾年出世嘅B，到時有部份可投身社會，時間啱啱好，所以今年放寬機會唔細。
由股民角度睇，細路仔多童裝股當然受惠，其中好孩子（1086）啱炒之餘又夠穩陣，可以吼實。不過未來中國女仔比例提高，到時女仔冇咁馨香，睇你仲敢唔敢公主病發作？
Fifi
本欄逢周二、四刊出