係人都知富咸前鋒貝碧托夫（貝碧）好波又瀟灑，估唔到原來佢仲好有藝術細胞，而且好鍾意似顏繪（Caricature）；日前佢將自己嘅作品上載到facebook，講真啲畫功真係幾得。第日佢掛靴之後，睇嚟可以向呢方面發展。
對「似顏繪」一見鍾情
現年32歲嘅貝碧由於腳法細膩，加上場上入親都係靚波，所以被公認係球場上嘅藝術家。而喺現實生活中，呢位保加利亞球員都稱得上係個藝術家，點解咁講？因為佢嘅似顏繪實在好有水準。日前佢就喺社交網站facebook同粉絲分享佢嘅作品，當中包括有荷李活動作巨星布斯韋利士(Bruce Willis)、《花花公子》創辦人赫夫納（Hugh Hefner）、美國電視劇《醫神》男主角Dr House、《教父》馬龍白蘭度（Marlon Brando）同埋美國著名饒舌歌手Snoop Dogg作品。
之前效力熱刺同曼聯嘅貝碧話：「我見到乜就畫乜，冇乜特定對象。我之前踢曼聯嘅時候，好鍾意畫啲隊友，我仲幫佢哋畫過似顏繪，而且仲畫得好似㖭。」至於點解會鍾意咗似顏繪，佢就咁講：「好耐以前我喺網上見到似顏繪，結果就一見鍾情。」
畫Snoop Dogg佢最like
貝碧成日俾人話似有份做《教父》嘅美國著名演員安迪加西亞，但佢就冇畫到安迪加西亞；而佢最滿意嘅作品，亦唔係馬龍白蘭度嗰張，佢話：「我最鍾意嗰幅係Snoop Dogg，如果你哋都喜歡，日後我應該會畫多幾幅。」其實，似顏繪係一種以諷刺、誇張或醜化手法表達嘅人像繪畫方法，所以要畫一幅有水準嘅作品，真係唔容易；睇嚟貝碧托夫真係好有呢方面嘅天份，綠茵場上藝術家呢個稱號，同佢真係襯到絕。