海迪有朋友擔心被業主大幅加租，近日四出尋找租盤，搵個細細地、10多年樓齡的500多呎單位，搬到入將軍澳，都要盛惠1.6萬元，呢個數字遲啲仲會加。他說，錢不是畀不起，而是畀咁嘅錢換來的居住空間和質素，嚴重地唔成正比。政府決定出招勁加雙倍印花稅，但背後的邏輯，其實根本就不會導致樓價下跌、幫到市民上車，或者改善民生的效果。
事關加印花稅，只是提升你的交易成本，唔會直接打擊到樓宇本身的價值，賣家見嗌價唔可以去到盡，會封盤睇定啲先。尤其揸住樓收租的投資者，更加唔願意放盤，因為想買番時，就會俾政府硬掘你幾廿萬，計落無着數。結果政府以為呢招只係打擊需求咩？其實咪又係同時影響埋供應。當買賣雙方唔想郁，只會令交投壓縮，樓價仍然唔會點跌。二手難搵盤，想上車逼晒去一手，發展商今年是靠量而非價食糊，所以新招對他們冇咩影響。
趕絕所有投資者，咁樣市場就會健康？真係too simple。朋友說，今次最大的side effect，係租金未來一定會急升。因為投資者唔會再買新盤，咁搵邊個放盤俾你租呀？市民望住高樓價仍然上唔到車，但卻要捱更貴租。真係唔該晒。
海迪