「單車王子」黃金寶，噚日接受體記協會頒發「銀河娛樂香港最佳男運動員」，如無意外，呢個都係佢最後一個運動員獎，事關佢已轉做公路單車教練一個月，連恩師沈金康都改口叫佢做黃教練；不過阿寶話對呢個新稱呼唔係好慣：「其實好多運動員都未慣我做教練，但最唔慣係沈教練打報告或電郵通訊嗰陣，叫我『黃教練』，可能佢想我盡快適應吧！」
黃教練第一個小考，就係下周一跟隊去印度亞錦賽，仲記得佢上年以接近39歲高齡奪亞錦公路賽冠軍，佢話：「以前喺亞錦賽落場踩車，𠵱家落手落腳幫隊員踩好比賽。」噚日沈教練不忘幽阿寶一默，事關場地記分賽有望喺2016年奧運「回歸」，沈教練就話：「到時阿寶又出來踩囉！」