港股噚日再隊300點去到22519，輕微跌穿周線圖保歷加通道中軸22556，呢個位有冇支持真係難估，如果周五明顯跌穿22556收市，例如去到22300或以下，確認周線圖保歷加中軸失去支持，睇怕後市都要試下軸21000水平先安樂。又係嗰句，見步行步，繼續保持防守性。
噚日跌得較勁嘅板塊有電訊設備同手機股，聯想集團（992）跌3%、中國無線（2369）插7%、京信通信（2342）跌5%，但有隻中國通信服務（552）獨善其身，只跌0.2%報5.02元，股價非常硬淨，保持52周高位水平。
中通信嘅硬淨絕對有其道理。電訊設備股當中，京信通信主要倚賴電訊商嘅資本開支作為收入，呢幾年電訊營運商投資高峯期已過，京信盈利自然今非昔比，相反，中通信去年上半年佔47%收入嘅業務流程外判服務，主要同電訊商嘅經營開支有關，呢啲收入唔需要驚電訊商削減資本開支，令整體業務長遠相對有防守性。
盈利穩增睇6.1元
中通信年幾之前曾經供股，供股價3.19元，雖然目前股價已高出57%，但晉佳認為中長線股價上到去供股價嘅double並唔困難，即係6.38元。供股集資額36.77億元，令到去年6月底淨現金超過80億元人民幣。財政健全仲要抽水，似乎有嘢想投資，係好事。
睇番估值，假設去年下半年業績同上半年相若，中通信去年市盈率就係11.5倍，事實上假設盈利按半年持平有啲保守。最近大半年港股升咗咁多，一隻盈利穩定年增長約一成嘅股份，照計已經值市盈率14倍，所以股價有條件升到去6.10元，同晉佳所講嘅供股價double相差無幾。
近排港股正值調整，預計成個調整過程有可能行三兩個月，甚至更長時間，呢啲避險情緒濃厚，但未至於恐慌性拋售嘅市況，盈利可測性高嘅中通信，將會受機構投資者歡迎。中線持有嘅話，可等到價或確認港股調整完成為止。
晉佳
本欄逢周一、三及五刊出