香港電訊（6823、HKT）近年落本搵陳豪、郭富城同古天樂賣廣告，大家當然關注呢幾位城中筍盤嘅身價，可惜公司噚日公佈業績，將推廣及宣傳開支，撥入一般及行政開支，無法清楚睇到條數，但呢項開支都唔細，按年增7%至90.7億。
宣傳及推廣唔只請代言人，仲包括公司由舊年開始執靚啲舖，又開幾間旗艦店推銷智能家居新概念。估唔到嘅係，除咗尖沙嘴、中環、旺角三個旺區，HKT本月喺天水圍開旗艦店。
天水圍一直被形容為悲情城市，HKT老闆小小超李澤楷竟然對天水圍另眼相看，同長實（001）喺天水圍有個嘉湖山莊有冇關係呢？