意大利選情玩殘環球股市，由於未有單一大黨同時控制兩院，或要重選，歐債危機隨之升溫，隔晚美股由升轉跌，埋單插水216點，拖累港股亦跌300點。最恐怖係全日升跌比例為13:87，即近九成股份見紅，難怪戰友牙痛咁聲。睇技術指標，恒指已偏離50日線（23148）逾600點，短期重返其上難度甚高，戰友要有心理準備。
噚日叫大家4蚊吸納時代集團（1023），在市況「配合」下即時到價，年度化息率超過六厘，相信有力一守。堡獅龍（592）公佈業績，半年盈利倒退42%至3,409萬銀，按半年計已成功扭虧為盈；一直拖着集團後腿嘅內地業務虧損收窄，星馬地區更有盈利貢獻，與集團大刀闊斧cut舖不無關係，整體毛利率按半年亦回升至47.7%。業績見曙光，派息亦不手軟，中期息連特別息派1.68仙，息率達4.2厘；最新淨現金水平達3.8億銀，相當於市值近六成，年度化市盈率唔夠10倍，點秤都值博，逢低吸納勝算高。
唐牛