想當年，香港地差人坐「艇仔」周圍走，駕「熊貓」四處跑。「艇仔」即係載客三輪電單車，二次大戰後警隊開始引入，主要用嚟接送長官出外辦公。六、七十年代嘅高級警長（等如現時警署警長），最愛坐「艇仔」出巡。「艇仔」有響號無警燈，司機唔可以用左腳落地平衡，容易翻車，到七十年代逐漸被取代。
「熊貓車」則係一款黑白色嘅巡邏車，英國警隊於六十年代開始使用，英文名真係叫做「panda car」㗎，本港警隊於七十年代引入「熊貓車」周街巡。現時囚車會被稱作「豬籠車」，最新一期《警聲》介紹正牌「豬籠車」，查實係當年常用作拘捕同運送無牌小販嘅大貨車。佢真身其實係一架貨車，但喺車斗同車頂之間用鐵網圍封，所以俗稱「豬籠車」。而有部俗稱「Jeep仔」嘅警用吉普車，就係用嚟接載機動部隊指揮官。
