場地單車世錦賽女子500米計時賽摘冠嘅李慧詩（Sarah），噚日身穿彩虹戰衣，由白俄羅斯凱旋。自嚿年倫奧贏得女子凱林賽銅牌後，Sarah接連喺大賽揚威，頻頻為港爭光；有網友就提議將年底啟用嘅將軍澳場地單車館，命名做「李慧詩場地單車館」，𠱁到當事人笑到唔停口。
喜聞「李慧詩單車館」
榮升為世界冠軍嘅Sarah凱旋，除咗吸引超過50名記者採訪，唔少旅客仲爭住影相簽名，Sarah任影任簽，一啲架子都冇。對於中國嘅郭爽喺爭先賽施展「鐵頭功」，佢就話：「只係意外，佢係無心。」心情靚爆嘅Sarah一聽到網友嘅提議，就忍唔住笑出嚟，「其實我都有諗過㗎，偶像賀爾（Chris Hoy）喺英國就有佢個名嘅場館，但我覺得如果叫做『李慧詩場地單車館』，會對其他港隊成員好唔公平，呢兩年我所贏嘅獎牌唔算多。」
航空公司免收8千蚊
Sarah今次留港唔夠30小時，但行程編到密麻麻，中午由機場殺入銅鑼灣，出席體育記者協會春茗，同「師兄」黃金寶分別當選年度最佳男、女子運動員，仲喺抽獎環節抽中500元超市現金券，真係鴻運當頭；可惜今早就要返去廣州訓練基地，準備3月嘅印度新德里亞錦賽，屋企人、朋友想同佢慶祝，怕且都要等多一陣。
原本今次帶返廣州嘅單車器材超出上限，負責付運嘅中國南方航空要佢額外畀多8,000蚊，但知道器材屬於Sarah之後，就決定分毫不收。至於亞錦賽，佢會出戰500米計時賽、爭先賽、凱林賽同團體爭先賽共4個項目，我哋預祝佢有好成績啦！
今次世錦賽Sarah贏到1金1銅固然勁揪，黃蘊瑤、郭灝霆等隊友亦踩出水準，香港單車聯會將會喺4月嘅慶功宴，頒發至少20萬港元獎金；唔止車手，連一眾教練、隊醫等幕後功臣都有份，大家都happy！
另外，有網民為Sarah算命，算出屬金嘅佢人緣好，事業同財富都同「驛馬」有好大關係，但如果曬得太黑，做事會比較辛苦，真係信不信由你！