春節過後，唔少內地廠房老闆好頭痛，因唔知幾多工人會乖乖返廣東開工。飛達（1100）副主席顏寶鈴一招大抽獎，今年竟然吸引到98%前線員工回歸！
抽獎人人中 最少50蚊
顏老闆話，年初九搞大抽獎，撥咗35萬（人仔．下同）做獎金，分畀逾2,000名深圳廠房員工，頭獎2,000大元，最少50蚊，人人有份，永不落空。對於月薪約3,000蚊嘅工人，呢份新春現金獎都算和味，加上公司送埋來回火車票，輕易吸番班員工。
不過顏老闆唔係隨便疏爽，佢不滿管理層每年花500萬坐飛機，今年設定上限200萬，若果做到200萬以下，就將差額分畀管理層，慳錢之餘又有鼓勵性，好橋！不過航空公司肯定唔like囉。